Psa 31 | YomNWM | STEP | Nkunga Davidi kuidi pfumu minyimbidi. Kuidi ngeyo, Yave ndintombila suamunu ; kadi khumbu yimosi ndifua tsoni ; wukhula mu busonga buaku.

Psalms 31

Nditula diana diama mu Yave

Nkunga Davidi kuidi pfumu minyimbidi.

1 Kuidi ngeyo, Yave ndintombila suamunu ;
kadi khumbu yimosi ndifua tsoni ;
wukhula mu busonga buaku.
2 Yinika dikutu diaku kuidi minu,
Yiza nsualu, mu kukhula !
Kuidi minu, bika wuba ditadi diama dingolo disuamina,
suamunu kingolo, mu diambu di kuphukisa.
3 Sumbu didi ti ngeyo ditadi diama dingolo
ayi suamunu kiama kingolo.
Mu diambu di dizina diaku
bika wuthuadisa ayi wundiatisa.
4 Bika wuthotula mu ntambu wu bathambila,
bila ngeyo suamunu kiama.
5 Mu mioko miaku ndintambika pheve ama ;
Wukhula, a Yave, ngeyo Nzambi yi kiedika.
6 Ndieti lenda bobo bansingiminanga mu bitumba biphamba.
Vayi minu diana diama didi mu Yave.
7 Ndiela mona khini ayi ndiela yangalala
mu diambu di luzolo luaku ;
bila wumona ziphasi ziama ;
wuzaba kiadi ki muelꞌama.
8 Ayi wusia ku ndiekula ko mu mioko mi mbeni.
Vayi ngeyo malu mama va buangu ki yalumuka.
9 Bika wumbona kiadi, a Yave,
bila mu ziphasi ndidi.
Meso mama ; mabividi mu diambu di maniongo
muelꞌama ayi nitu ama bibividi mu diambu di phasi
10 Luzingu luama lulembo suki mu kiadi
ayi mimvu miama milembo suki mu diambu di kunga.
Zingolo ziama zilembo suki mu diambu di ziphasi ziama,
ayi mimvesi miama milembo lebakana ngolo.
11 Mu diambu di bambeni ziama zioso,
ndiyikidi bila ki nlenzo kuidi bobo bafikimini yami
ayi bila ki tsisi yiwombo mu diambu di batu bobo bazabini yama.
Bobo bakumbona mu nzila balembo tini va ndidi.
12 Banzimbikini banga ti ndifua
Ndidi banga nzungu tuma yibudika.
13 Bila ndilembo wi balembo thubidila buwombo ku ndambu
ayi tsisi yingolo mu zindambu zioso
balembo kutakananga va kimosi mu diambu banduanisa ;
balembo yendila luzingu luama manenga.
14 Vayi minu, mu ngeyo ndintula diana diama, a Yave,
Ndieti tuba : “Ngeyo Nzambi ama.”
15 Bilumbu biama bioso bidi mu mioko miaku ;
wukhula mu mioko mi bambeni ziama
ayi mu mioko mi bobo balembo ndandakana.
16 Bika zizi kiaku kikienzukila kisadi kiaku ;
wuphukisa mu diambu di luzolo luaku lungolo.
17 Kadi tala ti ndifua tsoni, a Yave,
bila kuidi ngeyo ndiyamikina.
Vayi bika batu bambimbi bafua tsoni !
Bika baba dio sui ku tsi bafua !
18 Bika bididi bintotulanga luvunu biba dio sui ;
mu luniemo ayi mu mvuezolo beti yolukila
mu luyanu kuidi mutu wusonga.
19 A phila, mamboti maku madidi manneni ;
momo wulundila bobo beti kukinzika ;
momo wuvangila bobo beti tomba suamunu
kuidi ngeyo va ntuala batu.
20 Va ntuala meso maku, ngeyo weti kuba suekanga
mu diambu di mambimbi mayindulanga batu
ku buangu kioki wumvuandanga, ngeyo weti kuba keba mu luvovomo
mu ludimi lueti funda.
21 Nzitusu wuba kuidi Yave
Bila niandi wumbonisini luzolo luandi lungolo
mu thangu ndiba mu divula dizungulu kuidi masodi.
22 Mu boma buama minu ndituba : “Minu ndivengumunu thama va ntualꞌaku.”
Muaki ngeyo wuwa yamikina kuama mu diambu di kiadi
mu thangu nditela mu diambu di lusadusu.
23 Bika luzola Yave beno banlongo bandi boso.
Yave wunkebanga minkhuikizi
Vayi wumvutudilanga mu bufuana
bobo badi luniemo.
24 Lukikindisa ayi bika luba bukhafi mu mintima mieno ;
beno boso bobo luntulanga diana dieno mu Yave.